Në zgjedhjet e përgjithshme parlamentare të 11 majit 2025, banorët e njësisë administrative nr. 10 në Tiranë dhe të bashkisë Vorë do të votojnë përmes pajisjeve elektronike, duke shmangur përdorimin e fletëve tradicionale të votimit.

Komisioni Qendror i Zgjedhjeve (KQZ) ka njoftuar se këtë të hënë, në orën 11:30, do të zhvillojë testimin operacional të pajisjeve elektronike të identifikimit të zgjedhësve (PEI). Pajisjet PEI do të përdoren gjatë procesit të votimit për të identifikuar zgjedhësit dhe për të simuluar fazat e hapjes, mbylljes dhe verifikimit të votuesve në ditën e zgjedhjeve.

Testimi do të mbahet në Magazinën e KQZ-së në Vaqarr, ndërsa Komisioni ka ftuar të marrin pjesë përfaqësues të partive politike, organizatave të shoqërisë civile dhe medias.

KQZ thekson se synon garantimin e transparencës dhe besueshmërisë së procesit zgjedhor përmes përdorimit të teknologjisë moderne.