RIO DE JANEIRO — Autoritetet braziliane kanë parandaluar një sulm të mundshëm me pasoja katastrofike gjatë koncertit të Lady Gaga-s në plazhin ikonik të Copacabana-s, ku ishin mbledhur mbi dy milionë persona.

Në një operacion të koordinuar mes Policisë së Shtetit të Rio de Janeiros dhe Ministrisë braziliane të Drejtësisë, u arrestua personi që konsiderohet si truri i planit, ndërsa një adoleshent u ndalua nën dyshimin se ishte përfshirë në përgatitjen e sulmit. Policia bëri të ditur përmes një deklarate në platformën X se grupi kishte nisur rekrutimin e individëve për të kryer sulme me eksplozivë të improvizuar, me qëllim që të fitonin famë në rrjetet sociale.

“Objektivi i tyre ishte të gjeneronin ndikim dhe vëmendje mediatike, pavarësisht pasojave të mundshme për jetët njerëzore,” deklaroi një zyrtar i sigurisë, duke nënvizuar se hetimet kishin zbuluar sinjale të qarta për rrezik të menjëhershëm.

Koncerti madhështor i Lady Gaga-s ishte pa pagesë dhe konsiderohej një prej eventeve më të mëdha muzikore të mbajtura ndonjëherë në Rio. Një incident i tillë, po të realizohej, do të kishte sjellë pasoja shkatërrimtare, duke kthyer një festë masive në tragjedi kombëtare.

Falë ndërhyrjes së shpejtë dhe operacionit të suksesshëm të autoriteteve, skenari i një masakre u shmang në kohë. Ndërkohë, hetimet po vijojnë për të identifikuar nëse pas këtij plani qëndron një rrjet më i gjerë ekstremist.