Bashkëshortja e kryebashkiakut të Tiranës, Erion Veliaj, Ajola Xoxa, ka dhënë dëshminë e saj sot në SPAK, ku është pyetur nga hetuesit lidhur me hetimet në vazhdim për çështjen e përfshirjes në një skemë korruptive. Sipas burimeve, Xoxa i është komunikuar një akuzë tjetër, atë të fshehjes së të ardhurave.

Xoxa ishte paraqitur më herët në prokurori në kuadër të masës së sigurisë “detyrim paraqitje”, e caktuar ndaj saj më 12 shkurt. Hetimet intensive kanë nxjerrë në dritë fakte dhe dokumente të reja që lidhen me kompanitë e saj, të cilat kanë përfituar fonde jo vetëm nga Bashkia e Tiranës, por edhe nga bashki të tjera në vend.

Bashkë me bashkëshortin e saj, Erion Veliajn, Ajola Xoxa dyshohet se ka ndihmuar në ndërtimin e një mekanizmi kompleks korruptiv për të përvetësuar fonde publike, të cilat transferoheshin si ryshfet nga kompani kontraktore dhe OJF që përfitonin fonde nga Bashkia e Tiranës.

Ajola Xoxa është akuzuar për tre vepra penale: mosdeklarim pasurie, korrupsion dhe pastrim parash. Fillimisht, ndaj saj ishte caktuar masa “Arrest shtëpie”, e ndryshuar më pas në “Detyrim paraqitje”.