Një denoncim i fortë i kandidatit për deputet të Partisë Demokratike në Belsh, Dritan Cani, ka çuar në hapjen e një dosjeje penale në Prokurorinë e Elbasanit. Cani ka ngritur akuza për keqmenaxhim të fondeve publike dhe korrupsion zgjedhor, pas një denoncimi të postuar në median sociale “Facebook”.

Sipas Canit, punimet e asfaltimit të një rruge lokale, të kryera nga kompania “Vëllezërit Hysa” në Belsh, janë një manovër përfitimi nga ana e autoriteteve lokale, pasi rruga ndodhet në lagjen e Kryetarit të Partisë Socialiste në këtë qytet. Denoncimi është bërë një ditë më parë, dhe kandidati i PD-së ka ngritur dyshime se këto punime janë realizuar vetëm 5 ditë para ditës së zgjedhjeve parlamentare, për të tërhequr mbështetje nga zgjedhësit.

Në videon e postuar, Dritan Cani thekson se ky është një shembull tipik i manipulimit me qytetarët, duke pretenduar se pas 12 vitesh injorimi, tani autoritetet vendore kujtohen për nevojat e komunitetit, vetëm një javë para zgjedhjeve. “E denoncojmë publikisht këtë fakt, sepse gjatë gjithë këtyre viteve këta njerëz janë gënjyer, janë mashtruar dhe tani kjo është farsa e rradhës, me të cilën mundohen ti gënjejnë për t’i marrë votat,” tha Cani.

Prokuroria e Elbasanit ka nisur hetimet, duke pyetur disa persona dhe verifikuar përdorimin e fondeve për këto punime.