Kandidati demokrat për Qarkun e Fierit, Fation Semanjaku, ka reaguar pas shoqërimit të tij nga Policia mbrëmjen e së dielës, një veprim që ai e konsideron si një shfaqje të frikshme dhe të ndyrë të Edi Ramës dhe sistemit të tij. Në një deklaratë zyrtare, Semanjaku e cilësoi shoqërimin si një akt të pasinqertë dhe të politikës së frikës, që sipas tij ka përfshirë vendin për 12 vjet.

Kandidati i PD-së, gjithashtu, ka akuzuar kryebashkiakun e Fierit, Armando Subashi, për lidhje me bandat kriminale, të cilat, sipas Semanjakut, kanë sponsorizuar karrierën politike të tij. “Bin Bash, ti s’je kryetar i Bashkisë së Fierit, pasi Bashkia ka aksionerë disa kriminelë ordinerë, delikuentë me emër në këtë qytet. Ata janë që kanë sponsorizuar rrugën e tij në politikë,” tha Semanjaku.

Ai vijoi akuzat ndaj Subashit, duke theksuar se ai është “i kapur” dhe “i tredhur” nga bandat, dhe se përdor dhunën për të mbajtur kontrollin në Bashki. Semanjaku e quajti të paimagjinueshëm dëmin që Subashi dhe sistemi i Rilindjes kanë shkaktuar në Fier dhe kërkoi dorëheqjen e tij, duke i bërë thirrje që të lërë detyrën për t’i hapur rrugë një qeverisjeje të ndershme dhe të pastër.