Një ngjarje tronditëse ka ndodhur mëngjesin e sotëm në qytetin e Prizrenit, ku një baba ka kryer një akt të rëndë dhune ndaj familjes së tij, duke vrarë vajzën 15-vjeçare dhe duke plagosur rëndë gruan dhe vajzën tjetër 10-vjeçare.

Lajmi është konfirmuar nga zëdhënësi i Policisë së Kosovës, Shaqir Bytyçi, i cili ka bërë me dije se ngjarja ndodhi rreth orës 06:00 të mëngjesit në rrugën “Shotë Galica”.

“Rreth orës 06:00 kemi pranuar informatë se një person është me thikë në dorë në rrugën ‘Shotë Galica’. Policia është ndalur në vendin e ngjarjes, ku ka parë tri persona të lënduar, dhe njëra nga të lënduarat ka ndërruar jetë”, – deklaroi Bytyçi për Telegrafin.

Sipas të dhënave paraprake, burri dyshohet se ka therur me thikë gruan dhe dy vajzat e tij. Vajza 15-vjeçare nuk i mbijetoi plagëve, ndërsa vajza tjetër 10-vjeçare ndodhet në gjendje të rëndë dhe është dërguar me urgjencë në spital.

Policia ka arrestuar autorin e dyshuar dhe ka nisur menjëherë hetimet për zbardhjen e plotë të rrethanave të kësaj ngjarjeje makabre që ka tronditur opinionin publik në Kosovë.