Një aksident i rëndë detar ka ndodhur mbrëmjen e së shtunës në New York City, ku anija stërvitore “Cuauhtémoc” e Marinës Meksikane është përplasur me Urën e Bruklinit, duke shkaktuar dy viktima dhe të paktën 19 të plagosur.

Lajmi u konfirmua nga kryebashkiaku i qytetit, Eric Adams, i cili deklaroi se anija kishte humbur energjinë elektrike para përplasjes. Në bord ndodheshin gjithsej 277 persona, përfshirë ekuipazhin dhe pasagjerë. Disa prej tyre kanë përfunduar në spital, ku dy ndodhen në gjendje kritike.

Pamjet e shpërndara në rrjete sociale dhe nga mediat amerikane tregojnë momentin dramatik të përplasjes, ku anija godet njërën nga shtyllat e urës gjatë kalimit nën strukturën e saj.

Zyrtarë të Departamentit të Policisë së Nju Jorkut deklaruan se shkak i aksidentit dyshohet të jenë probleme mekanike dhe një ndërprerje e papritur e energjisë, që e la anijen të pakontrollueshme.

Autoritetet lokale dhe federale kanë nisur hetimet për të zbardhur plotësisht rrethanat e ngjarjes, ndërsa në vendngjarje vijon puna për pastrimin dhe kontrollin e dëmeve strukturore të urës.