Prokuroria pranë Gjykatës së Shkallës së Parë të Juridiksionit të Përgjithshëm, Tiranë, ka përfunduar hetimet dhe ka dërguar për gjykim shtetasin D.H., i akuzuar për veprën penale “Vrasje me paramendim”, kryer në bashkëpunim.

Sipas njoftimit zyrtar, nga hetimet ka rezultuar se D.H., në bashkëpunim me shtetasin B.B., janë autorët e vrasjes së shtetasit A.V., ngjarje e ndodhur më 17 maj 2010 në krahinën e Larisës, Greqi.

Dosja u hap në vitin 2017, pas kallëzimit të bërë nga xhaxhai i viktimës, i cili denoncoi se nipi i tij ishte gjetur i pajetë, i dhunuar brenda makinës së tij. Nga hetimet u provua se D.H. e njihte viktimën, dhe natën e krimit ndodheshin në të njëjtin lokal nate, që administrohej nga vetë viktima, ku kishin konsumuar alkool së bashku.

Prokuroria vërtetoi se pas largimit nga lokali, D.H. ka komunikuar me bashkëpunëtorin B.B., dhe të dy kanë ushtruar dhunë brutale ndaj viktimës, duke e goditur në këmbë, duar dhe pjesë të tjera të trupit, goditje që i shkaktuan vdekjen.

Më pas, autorët e kanë futur trupin e viktimës në makinën e tij personale dhe e kanë zhvendosur nga vendi i ngjarjes, në përpjekje për të fshehur krimin.

Sipas të dhënave të hetimit, natën e ngjarjes viktima mbante me vete tre çeqe me vlerë 150 mijë euro, ndërsa shkaku i vdekjes ka qenë goditjet e shumta në kokë.

Prokuroria konfirmon se janë mbledhur prova të mjaftueshme për të provuar se D.H. dhe B.B. kanë konsumuar veprën penale të vrasjes me paramendim në bashkëpunim, dhe rasti tashmë i është referuar gjykatës për shqyrtim penal.