SHKODËR – Policia e Shtetit ka zhvilluar një tjetër fazë të operacionit antidrogë të koduar “Koordinata”, duke asgjësuar 625 bimë narkotike të dyshuara si Cannabis Sativa në territorin e qarkut Shkodër. Aksioni ka si qëllim parandalimin, evidentimin dhe goditjen e tentativave për kultivim të bimëve narkotike në zonat malore dhe rurale.
Sipas njoftimit zyrtar të Policisë së Shtetit, si pasojë e kontrollit intensiv në njësitë administrative të Postribës dhe Rrethinës, janë gjetur dhe asgjësuar 188 bimë narkotike, ndërsa për këtë rast janë proceduar penalisht në gjendje të lirë për shpërdorim detyre dhe moskallëzim krimi:
- V. D., kryeplak i fshatit Drisht
- S. H., kryeplak i fshatit Kir
- A. M., specialist pyjesh
Kontrolle të ngjashme janë kryer edhe në njësitë administrative Gruemirë dhe Kastrat nga Komisariati i Policisë Malësi e Madhe, ku janë gjetur dhe asgjësuar 142 bimë kanabisi. Gjithashtu, në njësinë administrative Shllak, shërbimet e Komisariatit të Vaut të Dejës kanë gjetur dhe asgjësuar 295 bimë të tjera narkotike.
Policia bën të ditur se vijon puna për identifikimin, kapjen dhe ndjekjen penale të autorëve të kultivimit të bimëve narkotike, ndërsa operacioni “Koordinata” është ende në zhvillim në gjithë territorin e qarkut Shkodër.
