Një tragjedi e rëndë ka goditur qytetin Hyderabad në jug të Indisë, ku të paktën 17 persona kanë humbur jetën si pasojë e një zjarri shkatërrues që përfshiu një ndërtesë trekatëshe në orët e para të mëngjesit.

Sipas autoriteteve lokale, zjarri shpërtheu në katin përdhes, në një dyqan bizhuterish, dhe më pas u përhap me shpejtësi në katet e sipërme. Departamenti i emergjencës dhe mbrojtjes civile në shtetin Telangana raportoi se thirrja për ndihmë u mor pak pas orës 06:00 të mëngjesit me orën lokale. Operacionet e shuarjes së flakëve dhe kërkim-shpëtimit u zhvilluan në mënyrë intensive.

Autoritetet kanë publikuar emrat e viktimave, ndërsa shkaku i zjarrit është ende në fazë hetimi.

Kryeministri indian Narendra Modi ka reaguar menjëherë me një mesazh ngushëllimi, duke shprehur “pikëllimin e thellë” për humbjen e jetëve dhe ka shpallur kompensim prej 200,000 rupish (rreth 2,300 dollarë) për secilën familje të viktimave.

“Jam thellësisht i pikëlluar nga humbja e jetëve për shkak të një tragjedie nga zjarri në Hyderabad, Telangana”, u shpreh Modi në deklaratën zyrtare.

Tragjedia ka shkaktuar tronditje të madhe në opinionin publik, ndërkohë që priten më shumë detaje nga hetimi zyrtar për të zbuluar shkakun e zjarrit që solli këtë humbje të rëndë njerëzore.