Në një intervistë ekskluzive në Debat, në A2 CNN, Belind Këlliçi kritikoi fort kodin elektoral, duke e quajtur atë një “farsë elektorale” që, sipas tij, imponohet nga Edi Rama dhe rezulton në situata absurde, ku kandidatë me mbi 18 mijë vota, si doktor Ilir Alimehmeti, mbeten jashtë parlamentit, ndërkohë që sipas tij, brenda Kuvendit ulen “banditë” si Tërmet Peçi dhe Agron Malaj i Burrelit.

“Është e paimagjinueshme, por është edhe për shkak të këtij kodi elektoral që është i imponuar nga Edi Rama,” tha Këlliçi.

Ai nënvizoi se brenda Partisë Demokratike do të nisë një analizë e detajuar për rezultatin e 11 majit, por më parë do të bëhet një denoncim i plotë për manipulimet elektorale që, sipas tij, u panë në zgjedhje.

“Askush në këtë moment nga PD-ja nuk duhet t’i shmanget përgjegjësisë personale apo të ekipit. Patjetër, timonier është kryetari i partisë, por të gjithë kemi rolet tona,” shtoi Këlliçi, duke garantuar se PD-ja do të shfrytëzojë periudhën deri në publikimin e raportit të OSBE/ODIHR për të informuar opinionin publik për “çfarë ka ndodhur më 11 maj.”

Ai u shpreh se “analiza e brendshme dhe marrja e përgjegjësive” është çështje e forumeve dhe e ekipit, ku nuk kanë pasur të gjithë të njëjtin përkushtim dhe performancë.