Shkencëtarët kanë identifikuar një bakter të ri dhe tepër rezistent në stacionin hapësinor kinez Tiangong, i cili nuk është parë ndonjëherë më parë në Tokë. I zbuluar fillimisht në një tampon të vitit 2023, pas dy vitesh analizash intensive, mikrobi ka treguar karakteristika unike që e bëjnë të mund të mbijetojë në kushte mjedisore jashtëzakonisht ekstreme.

Gjatë qëndrimit në Tiangong, astronautët në mënyrë rutinore i nënshtrohen analizave me tampone për të monitoruar mikrobet që gjenden në ambient. Në një prej këtyre kontrolleve u zbulua një mikrobiomë krejtësisht e re, me përbërje dhe funksione që nuk janë të njohura më parë.

Bakteri, i quajtur “niallia tiangongensis”, ka një rezistencë ndaj stresit mjedisor shumë më të lartë se çdo mikrobi tjetër që njihet në Tokë. Përbërja kimike e tij e bën të aftë për të përballuar kushtet ekstreme që përfshijnë rrezatimin e lartë, mungesën e gravitetit dhe temperaturat e ndryshueshme.

Sipas ekspertëve, një bakter i ngjashëm në planetin tonë shkakton infeksione të rënda dhe shpesh vdekjeprurëse. Megjithatë, deri më tani nuk është konfirmuar nëse “niallia tiangongensis” është zhvilluar autonomisht në hapësirë apo ka ardhur nga jashtë.

Shkencëtarët po vijojnë studimet për të kuptuar më mirë sjelljen dhe rrezikun e këtij organizmi, ndërkohë që po punojnë për të siguruar mbrojtje maksimale për astronautët dhe pajisjet hapësinore nga një kërcënim i mundshëm bakterial alien.