Dy persona janë arrestuar nga Policia e Vlorës, pas kapjes në flagrancë me doza të ndara të lëndëve narkotike, të gatshme për shitje. Të arrestuarit janë shtetasit E. A., 18 vjeç, banues në fshatin Çukë, Sarandë, dhe A. R., 33 vjeç, banues në Vlorë.

Sipas njoftimit zyrtar të Policisë, arrestimet janë rezultat i një operacioni të përbashkët mes Specialistëve për Hetimin e Narkotikëve të DVP Vlorë, Komisariatit të Policisë Delvinë dhe Forcës së Posaçme “Shqiponja”, bazuar në informacione të siguruara në rrugë operative.

“Gjatë kontrollit fizik, shtetasit E.A. iu gjetën disa doza me lëndë të dyshuar narkotike kokainë, të cilat dyshohet se i posedonte me qëllim shitjeje në zonën e Sarandës. Po ashtu, shtetasit A. R. iu gjetën disa doza me lëndë narkotike të dyshuar si kanabis, që dyshohet se do t’i shiste në zona të ndryshme të qytetit të Vlorës”, thuhet në njoftimin e Policisë.

Materialet procedurale u referuan në Prokuroritë përkatëse për veprime të mëtejshme, ndërsa të dy të dyshuarit do të hetohen për veprën penale “Prodhimi dhe shitja e narkotikëve”.

Policia e Vlorës thekson se operacione të tilla do të vijojnë pa ndërprerje, në kuadër të luftës kundër shpërndarjes së drogës në zona urbane dhe turistike.