Një atentat tronditës ndodhi mëngjesin e 21 majit në afërsi të një shkolle ndërkombëtare pranë Madridit, ku avokati i njohur ukrainas, Andriy Portnov, u qëllua për vdekje në mes të ditës. Teksa po kthehej për të hipur në veturën e tij të tipit Mercedes, pasi kishte lënë fëmijët në shkollë, persona të armatosur hapën zjarr mbi të, duke e qëlluar pesë herë – plumbi i fundit në kokë rezultoi fatal.

Ngjarja, e cilësuar nga mediat spanjolle si një ekzekutim i pastër profesional, ka shkaktuar tronditje jo vetëm në Spanjë, por sidomos në qarqet politike të Ukrainës, ku Portnov kishte luajtur një rol të rëndësishëm ndër vite. I diplomuar për drejtësi, Portnov ka qenë një figurë e njohur në politikën ukrainase, i lidhur ngushtë me ish-presidentin Viktor Yanukovych dhe ka shërbyer si zëvendësshef i administratës së tij deri në përmbysjen e qeverisë në vitin 2014.

Portnov njihej për stilin e tij agresiv si avokat dhe përdorimin e drejtësisë si mjet presioni politik, duke ngritur padi të shumta ndaj gazetarëve dhe kundërshtarëve politikë. Pas rënies së Yanukovych-it dhe shpërthimit të luftës në Ukrainë, ai kishte qëndruar për një kohë jashtë vendit, mes të tjerash edhe në Austri e Rusi, përpara se të zhvendosej në Spanjë.

Autoritetet spanjolle kanë nisur një hetim të gjerë mbi ngjarjen, ndërsa nuk përjashtohet asnjë pistë – përfshirë ndonjë atentat politik ose larje hesapesh. Mediat ndërkombëtare raportojnë se Portnov ishte përfshirë edhe në çështje të ndjeshme ndërkombëtare, çka e bën vrasjen e tij një çështje me potencial ndikimi përtej kufijve spanjollë dhe ukrainas.

Hetimet vazhdojnë ndërkohë që familjarët dhe bashkëpunëtorët e tij kërkojnë drejtësi për një akt brutal që tronditi opinionin publik dhe ringjalli hijet e politikës së errët post-sovjetike në mes të Evropës.