Në një mesazh prekës, Diana Lame, nëna e Artan Lames, ndau me ndjekësit dhimbjen për ndarjen nga jeta të të birit, ish-kreu i Kadastrës dhe një nga figurat publike më të njohura në administratën shqiptare. Në rreshta të mbushur me pikëllim, ajo rrëfeu momentet e fundit të shpresës dhe optimizmit që Artani i dhuroi familjes së tij, pavarësisht gjendjes shëndetësore.

“Nuk më bën dora të shkruaj për humbjen e të shtrenjtit, djalit tim të dashur Artan Lame. Po ky moment i mallkuar erdhi dhe më shoi atë shpresë që mu ngjall dje,” shkroi ajo.

Diana Lame tregoi se ndiente një rreze shprese vetëm një ditë më parë, sepse Artani kishte qenë i qetë dhe optimist, duke i thënë:

“Nuk e kam mendjen te e nesërmja (që do operohej), jam mirë, jam i qetë, por po përqendrohem te Muzeu.”

Ajo theksoi përkushtimin e tij të palodhur ndaj Muzeut Kombëtar, një projekt për të cilin Artani kishte pasion të thellë deri në çastet e fundit.

“Edhe nga gjumi ta zgjosh, për Muzeun fliste.”

Në fund të mesazhit të saj, Diana Lame njoftoi se procedurat e përcjelljes së Artanit do të bëhen publike në vijim:

“Kur Tanin të ma sjellin këtu, do t’ju bëjmë të ditur procedurat e mëtejshme.”