Ndarja nga një partner është një nga përvojat më të dhimbshme emocionale që një person mund të kalojë. Megjithatë, sipas ekspertes së marrëdhënieve Cherlyn Chong, ka një mënyrë për të kaluar këtë stuhi zemre brenda vetëm 30 ditëve. Chong, e njohur për qasjen e saj praktike dhe psikologjike, ka ndarë një metodë katërhapëshe që synon të ndihmojë individët të rigjejnë balancën e brendshme dhe të rindërtojnë jetën pas ndarjes.

Hapi i parë: Vendimi – Pranimi i fundit

Shumë njerëz nxitohen të fshijnë numra, të bllokojnë rrjetet sociale apo të ndërpresin kontaktet, pa bërë më parë atë që Chong e quan hapi më i rëndësishëm: vendimi i ndërgjegjshëm që marrëdhënia ka përfunduar. Sipas saj, pa këtë hap, truri do të vazhdojë të ushqehet me shpresë të rreme dhe pyetje pa përgjigje si “pse nuk më shkroi?” apo “mos vallë do kthehet?”.

Hapi i dytë: Tokëzimi – Kthimi në trup dhe natyrë

Chong rekomandon një teknikë të pazakontë por efektive: ecjen zbathur në bar. Ky veprim i thjeshtë, sipas saj, ndihmon për të larguar tensionin, stresin dhe për të rikthyer lidhjen me realitetin fizik. “Shikimi poshtë dhe ndjesia e tokës nën këmbët tuaja kontribuon në një shëndet më të mirë mendor,” thotë ajo, duke theksuar rëndësinë e kthimit në të tashmen përmes trupit.

Hapi i tretë: Detoksifikimi emocional

Pas vendimit dhe tokëzimit, Chong sugjeron largimin e çdo gjëje që lidhet me ish-partnerin. Kjo nënkupton heqjen e fotove, mesazheve, kujtimeve fizike dhe virtuale që mund të nxjerrin plagët sërish në sipërfaqe. Sipas saj, kjo është mënyra e vetme për të ndalur rikthimet emocionale dhe për të çliruar energjinë e bllokuar.

Hapi i katërt: Riprogramimi i mendjes

Në fazën e fundit, eksperti fton të gjithë të përballen me bisedën e brendshme që zakonisht përforcohet pas një ndarjeje. “Zëvendësoni mendimet vetëfajësuese me afirmime pozitive si: ‘Unë jam i/e mjaftueshme’, ‘Unë meritoj një dashuri të shëndetshme’,” – thekson Chong. Ky proces ndihmon në rindërtimin e vetëbesimit dhe shërimin e identitetit pas humbjes së një lidhjeje.