Tiranë – Një incident i pazakontë ka ndodhur në ambientet e Qendrës Spitalore Universitare “Nënë Tereza”, ku një 42-vjeçar, Enis Vrapi, ka qëlluar me një pistoletë lodër drejt një mjekeje dhe më pas ka tentuar të arratiset me një automjet tip “Land Rover”, duke përplasur tre automjete të policisë në përpjekje për të shpëtuar nga arrestimi.

Burime zyrtare nga policia bëjnë me dije se pas ndjekjes së menjëhershme, Vrapi është neutralizuar dhe arrestuar në vendngjarje. Mësohet se i njëjti shtetas ishte arrestuar rreth 12 ditë më parë, pas një denoncimi të qytetarëve për të shtëna me armë sportive lodër në banesën e tij në Tiranë, që krijuan panik në lagje për shkak të zhurmës që ngjante me armë zjarri reale.

Probleme të shëndetit mendor – Vrapi u shtrua në spitalin psikiatrik, por u lirua pas 4 ditësh

Sipas dokumentacionit të siguruar nga gazetari, Enis Vrapi është shtruar në Spitalin Psikiatrik Nr. 5 më 11 maj, menjëherë pas arrestimit për incidentin me armën lodër. Ai qëndroi në institucionin shëndetësor deri më 15 maj, kur – sipas spitalit – u largua pasi nëna e tij doli garant dhe kërkoi lirimin, duke firmosur në kartelën përkatëse të pacientit.

Kjo ngjarje ka rikthyer në vëmendje shqetësimet për menaxhimin e rasteve me probleme të shëndetit mendor në komunitet dhe mungesën e kontrolleve të rrepta pas lirimit të tyre, sidomos kur ka precedentë të dhunshëm apo veprime që rrezikojnë sigurinë publike.

Policia po vijon hetimet, ndërsa pritet që Prokuroria të marrë në shqyrtim edhe rolin e institucioneve përgjegjëse për lirimin e 42-vjeçarit vetëm pak ditë para incidentit në QSUT. Gjendja e mjekes që u qëllua me armë lodër raportohet të jetë e stabilizuar dhe pa pasoja fizike.