Në kuadër të operacionit “Enigma” në Durrës janë arrestuar vëllezërit Voltan dhe Jugert Xhani, të dyshuar si organizatorë dhe financues të vrasjes së biznesmenit Bujar Nasufi, e ndodhur më 12 janar 2025 pranë “Pallatit me Shigjeta” në Tiranë.

Burime nga Prokuroria bëjnë me dije se në vendngjarje është gjetur një dorezë gjysmë e djegur me një profil ADN-je, e cila do të krahasohet me ADN-në e dy të arrestuarve. Për më tepër, me vendim gjykate është marrë edhe kampioni i ADN-së së nënës së tyre për të vërtetuar lidhjen.

Dy vëllezërit, të skeduar për trafik droge në Holandë, dyshohet se kishin konflikte të vazhdueshme me Nasufin për një pronë të shitura nga babai i tyre. Bujar Nasufi u qëllua për vdekje në sy të gruas së tij, teksa po parkonte makinën pranë banesës.

Voltan Xhani ishte më parë në kërkim për ekzekutimin e Elis Rroshkodolit në Shkodër, ku në servisin e tij u gjet makina e përdorur në vrasje. Ai përballet me akuza për “krijim të kushteve për të kryer vrasje” dhe “trafikim mjetesh motorike”. Prokuroria po heton lidhjet e mundshme mes vëllezërve Xhani dhe Rroshkodolit në trafikun e drogës.

Arratia e dy vëllezërve përfundoi të enjten në Durrës, ku u arrestuan në shoqërinë e Xhevdet Plakut, i njohur si “Akili”, i arratisur nga burgu në Itali, dhe Flobens Mecia, pjesë e organizatës kriminale të drejtuar nga vëllezërit Franc dhe Hajdar Çopja.

⸻