Kryetari i Partisë Demokratike, Sali Berisha, ka dalë me akuza të forta në një konferencë për shtyp ndaj deputetit të zgjedhur të PS-së, Arkend Balla, të cilin e cilësoi si produkt të kartelit të drogës “Troplini”. Sipas Berishës, Balla ka përfituar rritje të jashtëzakonshme të votave falë mbështetjes së këtij grupi kriminal dhe i është premtuar posti i ministrit të Brendshëm pas zgjedhjeve të 11 majit.

“Arkend Balla në vitin 2021 mori vetëm 2463 vota, ndërsa në 2025, nën patronazhin e kartelit Troplini dhe Elvis Doçit, siguroi plot 20.718 vota. Votat e tij janë pothuajse dhjetëfishuar. Madje, ka marrë 5 mijë më shumë vota se vetë Edi Rama në vitin 2021,” – deklaroi Berisha.

Kreu i opozitës denoncoi gjithashtu edhe praninë e elementëve të dyshimtë pranë qendrave të votimit në Vorë, ku sipas tij, karteli tjetër i drogës, “Xhabafti”, ka ushtruar terror ndaj qytetarëve. Berisha përmendi emrin e ministrit Blendi Xhabafti si përfitues të kësaj ndërhyrjeje kriminale në votime, duke akuzuar se “kontrollon hyrjen e Tiranës dhe mbjell frikë në çdo qendër votimi”.

“Ky është një ilustrim i ndërhyrjes së karteleve të drogës në zgjedhje. Edi Rama ka fituar falë kartelit Troplini në Durrës dhe kartelit Xhabafti në Vorë. Ky është bilanci i zgjedhjeve të vjedhura. Ky është bilanci i një qeverie që mbështetet te krimi për të qëndruar në pushtet,” – tha Berisha, duke shtuar se përfaqësues të tjerë të PS-së si Ilir Ndrazhi, Erion Meka dhe Ani Dyrmishi janë gjithashtu nën patronazhin e këtyre rrjeteve kriminale.

Berisha e mbylli deklaratën me thirrjen që organizatat kriminale si këto të shpallen zyrtarisht si organizata terroriste, pasi sipas tij, janë duke shkatërruar themelet e demokracisë dhe ekonomisë shqiptare përmes parave të drogës.