Policia e Tiranës ka finalizuar me sukses operacionin e koduar “Multiple”, që çoi në arrestimin e shtetasit turk Umit Oncu, 44 vjeç, një person me rrezikshmëri të lartë dhe i shpallur në kërkim ndërkombëtar për një sërë veprash penale të rënda. Operacioni u zhvillua nga Komisariati Nr. 3 në bashkëpunim me sektorin për Hetimin e Krimeve të Rënda dhe në koordinim të ngushtë me autoritetet turke.

Sipas njoftimit zyrtar të Policisë së Shtetit, Oncu është lokalizuar dhe arrestuar në Tiranë, ku fshihej nën identitet të rremë. Autoritetet gjyqësore të Turqisë kanë lëshuar ndaj tij dy urdhër-arreste:
• Prokuroria e Izmirit e akuzon për tentativë vrasjeje, krijim të organizatës kriminale për falsifikim dokumentesh dhe heqje të paligjshme të lirisë.
• Gjykata e Lartë e Karsiyakës i ka caktuar masën e sigurisë “arrest në burg” për posedim dhe trafikim të lëndëve narkotike.

Sipas Policisë shqiptare, Umit Oncu ishte kreu i një organizate kriminale që operonte në disa shtete dhe ishte përfshirë në veprimtari të shumta kriminale, duke përfshirë falsifikime, rrëmbime dhe trafik të lëndëve narkotike. Ai do të ekstradohet drejt Turqisë, ku do të përballet me drejtësinë.

Interpol Tirana është aktualisht në proces bashkëpunimi me autoritetet turke për përfundimin e procedurave të ekstradimit.

Ky operacion konsiderohet një goditje e rëndësishme kundër kriminalitetit të organizuar dhe një shembull i qartë i bashkëpunimit të ngushtë ndërkombëtar në fushën e sigurisë dhe rendit publik.