Një shtetas italian 63-vjeçar, me inicialet D. S., me banim të përkohshëm në Tiranë, ka ndërruar jetë mëngjesin e sotëm në një spital të kryeqytetit, vetëm dy ditë pas një ndërhyrjeje kirurgjikale në një klinikë dentare në Rrugën e Kosovarëve.

Sipas burimeve zyrtare nga Policia e Tiranës, italiani kishte kryer një ndërhyrje dentare më 20 maj 2025, dhe dy ditë më pas, më 22 maj, kishte kërkuar ndihmë urgjente në spital, pasi gjendja e tij shëndetësore ishte përkeqësuar ndjeshëm. Pavarësisht përpjekjeve të mjekëve për ta stabilizuar, 63-vjeçari nuk arriti të mbijetojë dhe ndërroi jetë mëngjesin e sotëm.

Specialistët për Hetimin e Krimit në Komisariatin e Policisë Nr. 2 kanë nisur hetimet për këtë ngjarje të rëndë dhe kanë marrë në pyetje administratorin dhe dentistin e klinikës ku u krye ndërhyrja. Materialet hetimore janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për të përcaktuar nëse ka pasur neglizhencë mjekësore apo përgjegjësi penale në këtë rast.

Ngjarja ka ngritur shqetësime për sigurinë e trajtimeve mjekësore në klinikat private dhe ka nxitur autoritetet të thellojnë hetimet për standardet e ndjekura gjatë ndërhyrjeve dentare dhe pasojat që ato mund të kenë për pacientët.