Një tërmet me magnitudë 5.7 të shkallës Rihter ka goditur sot rajonin Tarapacá në veri të Kilit, njoftoi Qendra Sizmologjike Evropiane Mesdhetare (EMSC). Lëkundjet sizmike janë ndjerë edhe në Bolivi, sipas raportimeve të agjencisë Reuters.

Tërmeti është regjistruar në një thellësi prej 103 kilometrash, çka sipas ekspertëve ka ndihmuar në zbutjen e pasojave në sipërfaqe. Deri në këto momente nuk ka raportime për viktima, të lënduar apo dëme materiale.

Autoritetet janë në gatishmëri për të monitoruar situatën dhe për të reaguar në rast të pasgoditjeve. Kili ndodhet në një nga zonat më aktive sizmike në botë, përgjatë asaj që njihet si “Unaza e Zjarrit” e Paqësorit.