Pas një përleshjeje të dhunshme me maçeta në një qendër tregtare në Melburn, autoritetet e shtetit australian të Viktorias kanë vendosur të përshpejtojnë ndalimin e shitjes dhe posedimit të këtij lloji arme, një masë që nuk kishte ndodhur më parë në historinë e Australisë. Vendimi u mor menjëherë pas incidentit të ndodhur të dielën pasdite në qendrën Northland, ku u përplasën dy banda rivale të të rinjve.

Një 20-vjeçar ndodhet ende në gjendje kritike në spital, ndërsa katër persona të tjerë janë arrestuar, përfshirë dy të mitur 15 dhe 16 vjeç, të cilët akuzohen për dhunë të rëndë, përdorim të armës së ftohtë dhe dëmtime trupore me dashje. Policia konfirmoi se të gjithë personat ishin të njohur për strukturat e rendit dhe se ngjarja ka qenë e planifikuar.

Kryeministrja e shtetit të Viktorias, Jacinta Allan, njoftoi se ndalimi i menjëhershëm i shitjes dhe mbajtjes së armëve të ftohta, si maçetat dhe thikat e mëdha, do të hyjë në fuqi që këtë të mërkurë, duke përshpejtuar ligjin që ishte planifikuar për në shtator. “Ky ndalim do të ndërpresë furnizimin dhe do të mbrojë komunitetin nga dhuna me armë të ftohta,” deklaroi ajo.

Sipas policisë, ndonëse përplasjet e tilla nuk janë të shpeshta në Viktoria, “ato janë shqetësuese dhe kanë pasoja të rënda për sigurinë publike.” Hetimet janë ende në vijim dhe priten arrestime të tjera.

Ligji i ri përfshin ndalimin e thikave me teh më të gjatë se 20 cm, përveç atyre që përdoren për gatim. Po ashtu, nga shtatori, autoritetet do të ofrojnë një amnisti tremujore, ku qytetarët mund të dorëzojnë armët e ftohta vullnetarisht në kuti të posaçme pranë stacioneve të policisë.

Kjo masë vjen si përgjigje ndaj rritjes së incidentëve të dhunës me thika dhe maçeta në radhët e të rinjve, sidomos në zonat urbane të Australisë.