Një shpërthim i fuqishëm është dëgjuar mbrëmjen e sotme pranë burgut të Fushë-Krujës, rreth orës 22:45, duke alarmuar banorët e zonës dhe autoritetet. Menjëherë pas sinjalizimit, forca të shumta policore dhe grupi hetimor kanë mbërritur në vendngjarje për të verifikuar rrethanat.

Burime nga Policia e Shtetit bëjnë me dije se shpërthimi është raportuar të ketë ndodhur brenda perimetrit të IEVP-së (Institucioni i Ekzekutimit të Vendimeve Penale) Fushë-Krujë, por fatmirësisht nuk ka persona të lënduar dhe as dëme materiale.

Sipas të dhënave paraprake, dyshohet se shpërthimi ka ardhur nga një gjenerator, i cili më herët mund të ketë marrë flakë, duke shkaktuar plasjen e depozitës së karburantit.

Në vendngjarje ndodhen oficerë të policisë së Tiranës dhe të Komisariatit të Policisë Krujë, të cilët po punojnë për të dokumentuar çdo provë dhe për të përcaktuar shkakun e saktë të ngjarjes.

Policia e Krujës ka reaguar me një informacion paraprak:

“Rreth orës 22:45, ka ardhur një telefonatë në sallën operative të DVP Tiranë, se është dëgjuar një shpërthim brenda perimetrit të IEVP Fushë-Krujë. Nga shpërthimi nuk ka persona të lënduar dhe as dëme materiale. Grupi hetimor dhe shërbimet e Policisë ndodhen në vendngjarje dhe po punojnë për sqarimin e rrethanave të rastit dhe përcaktimin e llojit të shpërthimit.”

Hetimet janë në vijim dhe autoritetet pritet të japin më shumë informacion në orët në vazhdim.

⸻