ROMË – Një 44-vjeçar shqiptar, i zhdukur prej dy ditësh, u gjet mëngjesin e sotëm në një zonë të thellë pyjore pranë gurorës afër liqenit të Giulianello-s, në komunën e Artenës, provinca e Romës.
Operacioni i kërkimit, i zhvilluar rreth orës 10:00, përfshiu helikopterin e Zjarrfikësve të Colleferro-s, njësi të specializuara të Brigadës së Zjarrfikësve, si dhe karabinierët e stacionit lokal, që ndërhynë pas sinjalizimit të bërë nga partnerja e tij, dy ditë më parë.

Shtetasi shqiptar u lokalizua përmes teknikave të kërkimit ajror dhe tokësor. Ai u nxor nga zona me ndihmën e një vinçi helikopteri, u sigurua dhe u dërgua menjëherë në një terren të sheshtë ku ndodhej një autoambulancë. Më pas, u transportua me urgjencë (me kod të kuq) në spitalin e Colleferro-s.

Gjendje shëndetësore e rëndë – dyshime për gëlltitje substancash helmuese

Sipas burimeve mjekësore, gjendja e të plagosurit mbetet e rëndë dhe me prognozë të rezervuar. Dyshohet se ai ka gëlltitur substanca helmuese, duke ngritur dyshime për tentativë vetëvrasjeje.

44-vjeçari, i cili punonte në ndërtim, ishte larguar nga banesa pas kthimit nga puna dy ditë më parë, pa lënë ndonjë shenjë apo komunikim. Partnerja e tij kishte bërë kallëzim për zhdukjen menjëherë, çka aktivizoi strukturat e kërkimit.

Karabinierët kanë nisur hetimet për të sqaruar shkaqet që çuan në këtë ngjarje të rëndë. Autoritetet nuk përjashtojnë asnjë pistë, përfshirë edhe atë të një krize personale apo psikologjike që mund ta ketë shtyrë drejt këtij veprimi.