Një zjarr i përmasave të mëdha ka përfshirë masivin pyjor të Darëzezës, duke krijuar shqetësim për banorët e zonës dhe mjedisin përreth. Flakët po përhapen me shpejtësi, të favorizuara nga era e fortë, çka po e vështirëson ndërhyrjen.

Sipas informacioneve paraprake, në terren ndodhen katër mjete zjarrfikëse, të cilat po punojnë intensivisht për shuarjen e zjarrit dhe për izolimin e vatrave për të mos lejuar përhapjen në zona të tjera.

Aktualisht janë tre vatra aktive, ndërkohë që nuk raportohet ende për rrezik të drejtpërdrejtë ndaj banesave apo jetës së njerëzve.

Autoritetet kanë bërë të ditur se pritet një njoftim zyrtar në orët në vijim, ku do të informohet më saktësisht mbi përmasat e dëmit dhe masat që po merren për kontrollin e situatës.

Zjarret në masivet pyjore përbëjnë rrezik serioz për mjedisin, biodiversitetin dhe ekonominë lokale, ndaj forcat e emergjencës vijojnë të jenë në gadishmëri për çdo përkeqësim të situatës.