Bota e modës dhe bukurisë është ende në zi për ndarjen e parakohshme nga jeta të stilistit të famshëm të flokëve, Jesus Guerrero, një nga emrat më të afërt të Kylie Jenner. Shkaku i vdekjes së tij është konfirmuar nga autoritetet amerikane.

Sipas Departamentit të Mjekësisë Ligjore të Qarkut Los Angeles, Guerrero ndërroi jetë si pasojë e një pneumonie të rëndë, e shkaktuar nga një infeksion fungal që ndodhet natyrshëm në mjedis. Infeksioni u përhap për shkak të një sistemi imunitar të dobësuar, gjë që e bëri organizmin e tij veçanërisht të ndjeshëm. Vdekja është klasifikuar si natyrale.

Lajmi për humbjen e tij u bë publik nga motra e tij, Gris, më 22 shkurt, në një postim prekës në faqen GoFundMe, ku shkruante:

“Me zemër të rënduar, ju njoftojmë se Jesus Guerrero ka ndërruar jetë. Ai ishte bir, vëlla, dajë, artist, mik dhe shumë më tepër. Lindi dhe u rrit në Houston, Texas, nga prindër emigrantë, dhe punoi me shumë pasion për të arritur majat e karrierës.”

Guerrero, i cili ndërroi jetë në moshën 34-vjeçare, ishte një nga stilistët më të kërkuar të yjeve në Hollywood. Me duart e tij ai formoi disa nga pamjet më të komentuara të Kylie Jenner dhe influencoi stilin e shumë personaliteteve të njohura.

Humbja e tij ka lënë një boshllëk të ndjeshëm në industrinë e bukurisë, ndërsa rrjetet sociale janë mbushur me mesazhe ngushëllimi dhe homazhe nga figura publike që kanë bashkëpunuar me të. Një talent i jashtëzakonshëm, një shpirt i ndjeshëm – kujtimi i tij do të mbetet i paharruar.