Presidenti i Ukrainës, Volodymyr Zelensky, ka hedhur poshtë propozimin e Rusisë për një armëpushim të përkohshëm dhe të kufizuar, duke e quajtur atë një manovër taktike për të fituar kohë dhe për të shmangur sanksionet e reja nga SHBA.
Sipas Zelenskyt, ideja e një armëpushimi 2-3 ditor me pretekstin për të mbledhur trupat e ushtarëve të rënë është një tentativë e hapur për të zvarritur presionin ndërkombëtar mbi Kremlinin.
“Mendoj se janë budallenj, sepse, në parim, një armëpushim synon të sigurojë që të mos ketë viktima”, u shpreh ai.
Ai theksoi se të vetmet mjete që ndalojnë Rusinë janë sanksionet e rënda ekonomike, ndaj bëri thirrje për veprim të menjëhershëm nga Kongresi Amerikan.
“Kjo është arsyeja pse dua vërtet që partnerët tanë amerikanë të marrin masa të forta dhe të dërgojnë një paketë sanksionesh në Senat, për të ushtruar presion mbi rusët që të ndalojnë armiqësitë me sanksione të forta. Ata nuk kuptojnë asnjë mënyrë tjetër”, tha ai.
Zelensky kujtoi se kanë kaluar tre muaj që kur Shtetet e Bashkuara sinjalizuan mbështetjen për një armëpushim të plotë, të cilin Ukraina e pranoi, dhe se kërkesat e Kievit nuk kanë ndryshuar.
Ky reagim vjen në një kohë të ndjeshme për përpjekjet diplomatike ndërkombëtare, ndërsa lufta në Ukrainë vijon të përshkallëzohet dhe pasojat e saj ndihen globalisht.
