Numri i personave të plagosur pasi një makinë përplasi turmën gjatë paradës së fitores së Liverpool FC në Premier League është rritur në 109, njoftojnë autoritetet policore.

Incidenti ndodhi rreth orës 18:00 më 26 maj në rrugën Water Street, ku një automjet goditi tifozët që festonin rikthimin e ekipit në qytet. Mes të plagosurve është edhe një fëmijë nëntëvjeçar, një nga viktimat më të vogla të këtij ngjarjeje.

Shoferi i makinës, Paul Doyle, 53 vjeç, u paraqit të premten para Gjykatës së Magjistratëve dhe Gjykatës së Lartë të Liverpool-it, ku përballet me shtatë akuza, përfshirë plagosje të rëndë trupore me dashje, përpjekje për të shkaktuar plagosje të rëndë dhe drejtim të rrezikshëm të mjetit. Doyle, ish-marins dhe baba i tre fëmijëve, pritet të dalë sërish në gjykatë më 14 gusht për seancën e pranimit të fajësisë.

Në fillim, policia raportoi për 79 të plagosur, por ky numër u rrit pasi u identifikuan edhe persona të tjerë me lëndime të lehta, të cilët kërkuan ndihmë mjekësore vetë në spital. Autoritetet vazhdojnë hetimet për ngjarjen që tronditi qytetin.