Lamine Yamal, talenti i ri i FC Barcelonës dhe kombëtares spanjolle, foli në emisionin “El Partidazo” të Cope për situatën e tij personale dhe atë të ekipit kombëtar dhe klubit.

“Unë nuk mendoj për fitimin e Topit të Artë. Dua të kënaqem dhe të luaj mirë. Nëse do të ndodhë, do të ndodhë,” tha ai në lidhje me mundësinë për të fituar çmimin prestigjioz.

Në një sfidë të ardhshme, Yamal do të përballet me ish-bashkëlojtarin dhe kandidatin tjetër për Topin e Artë, Ousmane Dembélé. “Nëse do të votoja për lojtarin më të mirë të vitit, pasi do të luajmë të enjten, titullin do ta mbaja për vete,” shprehu me siguri ai.

Në lidhje me një hipotetik transferim te rivali i përbetuar, Real Madrid, Yamal ishte i prerë: “Jo, është e pamundur.”

Sulmuesi zbuloi edhe motivimin e tij para ndeshjeve, duke treguar se miqtë i dërgojnë video provokuese në TikTok për t’i ndezur garën. “Për shembull, para ndeshjes me Francën në Kupën e Evropës, shoku im më telefonoi për të më kujtuar çfarë më kishte thënë Rabiot,” rrëfeu ai.

Në lidhje me FC Barcelonën, Yamal është optimist: “Po përmirësohemi, por duhet të besojmë që jemi më të mirët. Kur Real Madridi humbi ndaj Arsenalit, shumë menduan se mund të riktheheshin. Kur ne barazuam me Interin, pati dyshime. Kjo duhet të ndryshojë.”

Në fund, ai zgjodhi emrat e tij të preferuar nga Liga e Kampionëve: trajnerin Luis Enrique, portierin Gianluigi Donnarumma, mbrojtësin Willian Pacho, mesfushorin Pedro González ‘Pedri’ dhe sulmuesin Vitor Ferreira ‘Vitinha’.