Prishtinë, 6 qershor 2025 – Kryeministri në detyrë i Kosovës, Albin Kurti, ka uruar qytetarët me rastin e festës së Kurban Bajramit, duke theksuar rëndësinë e vlerave të solidaritetit, barazisë dhe zemërgjerësisë që përfaqëson kjo ditë e shenjtë.

Përmes një mesazhi të publikuar në Facebook, Kurti theksoi se Kurban Bajrami është një thirrje për të jetuar në harmoni me njëri-tjetrin, duke ndarë jo vetëm pasurinë materiale, por edhe dashurinë dhe mirëkuptimin.

“Kjo festë është një kujtesë për ne që të jetojmë në harmoni, duke ndarë dashurinë dhe begatinë me njëri-tjetrin,” – u shpreh Kurti.

Ai theksoi se vlerat e Kurban Bajramit janë edhe një angazhim për ndërtimin e një shoqërie të drejtë, ku të gjithë qytetarët gëzojnë mirëqenie dhe siguri.

Duke uruar qytetarët që kjo festë t’i gjejë pranë familjes dhe të dashurve, Kurti përfundoi urimin e tij me fjalët:

“Uroj që kjo ditë t’ju sjellë mirësi, shëndet dhe lumturi – sot dhe gjithmonë.”