Policia e Vlorës ka finalizuar me sukses një tjetër operacion antidrogë të koduar “Reset”, duke goditur një rast të shpërndarjes së lëndëve narkotike në zonën bregdetare të Dhërmiut.
Në pranga ka rënë shtetasi Maklit Muçaj, 46 vjeç, banues në Tiranë, i cili dyshohet se shpërndante lëndë narkotike të llojit kokainë, kryesisht në ambientet e natës në Drimadhes.
Gjatë kontrollit në dhomën ku qëndronte i arrestuari, shërbimet e Policisë sekuestruan:
• 126 doza lëndë të dyshuar narkotike kokainë,
• 136 400 lekë të rinj, të dyshuara si të përfituara nga shitja e drogës,
• 1 peshore elektronike.
Operacioni u zhvillua nga specialistët e Seksionit për Hetimin e Narkotikëve të DVP Vlorë, në bashkëpunim me Stacionin e Policisë Dhërmi, pas informacioneve të siguruara në rrugë operative mbi aktivitetin kriminal të 46-vjeçarit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për vijimin e veprimeve të mëtejshme ligjore.
Policia e Vlorës bën thirrje për bashkëpunim me qytetarët dhe garanton se do të vijojë me intensitet veprimtarinë për goditjen e shpërndarësve të drogës, veçanërisht në zonat turistike gjatë sezonit veror.
