Një rast i rëndë dhe i tmerrshëm u zbulua së fundmi në Gjermani, ku një burrë nga Saksonia e Poshtme drogoi dhe përdhunoi gruan e tij për të paktën 15 vite, duke regjistruar dhunën dhe duke publikuar videot në faqe pornografike online. Sipas hetimeve të transmetuesit gjerman NDR, videot e këtyre aktit kriminal janë parë mbi 14 milionë herë vetëm në një nga faqet e internetit.

E rëndë është edhe vonesa e zbulimit të këtij krimi: viktima kuptoi përfundimisht se çfarë po ndodhte vetëm në fund të vitit 2024, ndërsa materialet e dhunës në internet datojnë të paktën që nga viti 2006.

Emisioni investigativ STRG_F, në kuadër të programit “Ne Gjejmë Autorin”, ka qenë për vite me rradhë duke infiltruar rrjete të përdhunuesve, duke përdorur profile sekrete dhe duke komunikuar drejtpërdrejt me shumë prej tyre në faqet e internetit pornografike.

Që prej korrikut 2023, ekipi i emisionit i ka dërguar informacionet Zyrës Federale të Policisë Kriminale (BKA), e cila ia ka kaluar rastin policisë së Hamburgut. Por hetimi zyrtar nisi thuajse një vit më vonë, në gusht 2024, kur u konfirmua se gruaja ishte droguar dhe përdhunuar mesatarisht çdo dy javë.

Ndërkohë, është nisur një hetim i brendshëm për vonesën e hetimeve dhe për caktimin e përgjegjësive penale apo administrative ndaj atyre që nuk reaguan me kohë.

Në një intervistë ekskluzive për emisionin, gruaja tha: “Në një moment ai do të më vriste.” Ajo përshkroi gjendjen e saj të rënduar fizike dhe psikologjike, duke thënë se shpesh zgjohej vonë me dhimbje koke të forta.

Para se të ekzekutohej urdhri i arrestit për burrin, ky i fundit humbi jetën në një aksident automobilistik misterioz, ku nuk ishin përfshirë makina të tjera.

Rasti tronditës ka shtyrë hetime të mëtejshme mbi rrjetet ndërkombëtare të përdhunimit, ku një person është arrestuar tashmë në Zvicër për një ngjarje të ngjashme.

Hetimi nxjerr në pah se këto rrjete funksionojnë prej vitesh pa pengesa në faqe të ndryshme interneti, ku përdhunuesit gjermanë dhe të huaj ndërveprojnë, shkëmbejnë këshilla dhe publikojnë video me dhunë reale.

Faqja e internetit në fjalë nuk iu përgjigj kërkesës për koment, ndërsa administratori premtoi të hetonte çështjen dhe të hiqte përmbajtjet që shkelin rregullat.

Gazetarët vazhdojnë monitorimin e situatës, duke vënë re se shumë video janë fshirë, dhe përdoruesit kanë nisur kërkimin e platformave alternative për materialet e paligjshme.

Ky skandal trondit jo vetëm Gjermaninë, por hedh dritë mbi një problem global të përdhunimit dhe shpërndarjes së përmbajtjeve kriminale në internet, duke kërkuar reagim dhe përgjegjësi urgjente nga autoritetet dhe kompanitë e teknologjisë.