Presidenti i Shteteve të Bashkuara, Donald Trump, ka urdhëruar forcat e rendit që të arrestojnë protestuesit që mbajnë maska, duke rritur ndjeshëm tensionet në qytetin e Los Angeles, ku po zhvillohen protesta masive kundër goditjes së administratës ndaj imigracionit.

Në një postim në rrjetin e tij Truth Social, Trump deklaroi qartë:

“ARRESTONI NJERËZIT ME MASKË, TANI”.

Ai njoftoi gjithashtu se mbajtja e maskave nuk do të lejohet më në protesta, duke ngritur pikëpyetje mbi ligjshmërinë e një vendimi të tillë. Sipas ekspertëve ligjorë, mbetet e paqartë nëse qeveria federale ka juridiksionin për të ndaluar përdorimin e maskave në manifestime publike.

Protestuesit: Maskat janë mbrojtje nga identifikimi dhe gazi

Pjesëmarrësit në protestë thonë se maskat janë një mjet mbrojtës, si për të shmangur identifikimin përmes fytyrës nga autoritetet, ashtu edhe për t’u ruajtur nga tymi dhe gazi lotsjellës që përdoret në përplasjet me forcat e rendit. Në disa raste, protestuesit kanë përdorur edhe maska industriale për të parandaluar efektet nga fishekzjarrët apo municionet tymues.

Trump dërgon Gardën Kombëtare në LA, Guvernatori: “Veprim i paligjshëm”

Të dielën, Presidenti Trump urdhëroi vendosjen e trupave të Gardës Kombëtare të Kalifornisë në rrugët e Los Angeles, për të përballuar ditën e tretë të protestave. Kjo ndërhyrje federale u kundërshtua ashpër nga Guvernatori demokrat i Kalifornisë, Gavin Newsom, i cili e cilësoi vendosjen e trupave “të paligjshme”.

Trupat e Gardës Kombëtare janë pozicionuar përreth ndërtesave federale, ndërkohë që në pjesë të ndryshme të qytetit janë raportuar automjete të djegura dhe përplasje fizike mes demonstruesve dhe forcave të sigurisë.

Los Angeles, qyteti i dytë më i madh në SHBA, është shndërruar në qendër të pakënaqësisë publike pas bastisjeve të reja të agjencive federale të imigracionit, të urdhëruara nga administrata Trump.