Kuba është rikthyer në fokusin e administratës së Presidentit amerikan Donald Trump, ndërsa raportohet për një rritje të pranisë së inteligjencës amerikane në ishull gjatë muajve të fundit.

Sipas të dhënave të publikuara nga Politico, asetet e inteligjencës së Shteteve të Bashkuara në Havana janë shtuar, në një kohë kur Uashingtoni vijon presionin ndaj qeverisë kubane për reforma politike dhe ekonomike.

Burime pranë administratës amerikane kanë bërë të ditur se Kuba konsiderohet një “prioritet i lartë” për Sekretarin e Shtetit Marco Rubio. Sipas tyre, angazhimi i Uashingtonit në ishull nuk lidhet domosdoshmërisht me përfundimin e çështjeve të tjera ndërkombëtare, përfshirë Iranin.

Ndërkohë, The New York Times raportoi se CIA ka krijuar një task forcë të posaçme për Kubën, me qëllim koordinimin e një fushate presioni ndaj qeverisë komuniste në Havana.

Sipas raportimeve, njësia e re do të mundësojë vendosjen më të shpejtë të burimeve amerikane në terren, duke përfshirë agjentë të inteligjencës dhe analistë. Objektivi i saj, sipas burimeve, është krijimi i presionit të brendshëm ndaj elitës politike kubane dhe nxitja e ndryshimeve ekonomike e politike.

Megjithatë, zyrtarë të cituar nga mediat amerikane theksojnë se misioni aktual nuk parashikon përdorimin e forcës dhe nuk ka partnerë kubanë të përfshirë. Njësia mund të ndryshojë natyrën e veprimtarisë së saj në varësi të vendimeve të administratës amerikane.

Raportimet kanë rikthyer krahasimet me operacionet e mëparshme të CIA-s në Kubë, përfshirë përpjekjen e dështuar të pushtimit në Gjirin e Derrave në vitin 1961. Megjithatë, burime amerikane insistojnë se objektivat aktuale janë më të kufizuara dhe fokusohen në ndikimin politik dhe diplomatik.

Kuba, së bashku me Kinën, Iranin dhe Rusinë, është klasifikuar si një nga prioritetet kryesore të inteligjencës amerikane. Në muajin maj, drejtori i CIA-s, John Ratcliffe, zhvilloi një vizitë në ishull, ku u takua me përfaqësues të elitës politike kubane.

Sipas burimeve, Ratcliffe ka paralajmëruar se koha për ndryshime po shkurtohet dhe se Kuba mund të përballet me masa të ngjashme me ato të ndërmarra ndaj Venezuelës.

Megjithatë, mbetet e paqartë nëse dhe kur Shtetet e Bashkuara do të ndërmarrin hapa më të mëdhenj ndaj Havanës, ndërsa zhvillimet ndërkombëtare dhe situata në rajone të tjera do të ndikojnë në vendimet e ardhshme të administratës Trump.