Në një reagim të ashpër ndaj kryetares në detyrë të Bashkisë së Tiranës, Anuela Ristani, po përflitet për përdorimin e makinës dhe shoferit të institucionit për çështje personale, si edhe për kohën e shfrytëzuar gjatë orarit të punës për aktivitetet private, si palestra.

“Nëse kryetarja në detyrë e Bashkisë së Tiranës, Anuela Ristani, ka përdorur makinën dhe shoferin e këtij institucioni për t’i çuar dhe marrë bashkëshortin në punë, si dhe nëse gjatë orarit të punës ka shkuar të bëjë vetë palestër, kjo do të ishte një papërgjegjshmëri e madhe dhe ajo do të duhej të jepte menjëherë dorëheqjen, duke ndjekur shembullin e kolegeve të saj në perëndim”, theksohet në reagim.

Në vijim, autori shton:

“Ajo paguhet me taksat tona që të bëjë punët e qytetit dhe jo që të bëjë kokrrën e qejfit. Çdo media që demaskon sjellje të tilla abuzive me pushtetin meriton vetëm lavde dhe i shërben në mënyrën më të mirë të mundshme të mirës publike.”

Sulmi ndaj Anuela Ristanit, sipas burimeve të sigurta, i dirigjuar nga burgu i Durrësit

Sipas burimeve të brendshme të sigurta, ky sulm i koordinuar ndaj kryetares në detyrë të Bashkisë së Tiranës thuhet se po drejtohet nga burgu i Durrësit, ku ndodhet i arrestuar kryetari i zgjedhur i Bashkisë, Erion Veliaj. Ai po hetohet për çështje të rënda korrupsioni dhe fshehje pasurie.

Në një analizë të mëtejshme, bëhet fjalë për një luftë brenda llojit mes figurave të PS-së, për dominim në karrigen e Bashkisë së Tiranës:

“Nuk ka asgjë për t’u çuditur që ky është vetëm hapi i radhës në luftën brenda llojit, të marionetave socialiste, që janë në garë se kush do të jetë delfini i radhës.”

Veliaj, sipas informacioneve, ka shfrytëzuar marrëdhënien e tij me Çim Pekën të Syri TV për të goditur në shenjë, duke e bërë Anuela Ristanin të humbasë kontrollin dhe të kërkojë llogari drejtpërdrejt gazetarit për punën e tij.

“Ajo harroi se llogari para qytetarëve japin shërbëtorët publikë, jo gazetarët”, thuhet më tej.

Politika dhe presionet: Veliaj besnik ndaj Ramës, por lufton kundër “uzurpatorëve” në bashki

Në të njëjtën kohë, Veliaj vazhdon të shprehë besnikëri dhe përkrahje ndaj kryeministrit Edi Rama përmes postimeve në Facebook, duke shpresuar se ky do të ushtrojë presion për lirimin e tij nga hetimet.

Por, në anën tjetër, ai po sulmon fort njerëzit që ai i quan uzurpatorë të karriges së tij në Bashkinë e Tiranës, të cilët, sipas reagimit, janë emëruar po nga Rama.

Në përfundim, ngrihet apeli:

“Ka ardhur koha që Veliaj ta pranojë fatin e tij tragjik dhe të bëhet një ‘pentito’ politik dhe të nxjerrë sheshit bëmat e shefit të tij. Kjo është e vetmja gjë që do t’i bënte nder.”