Miq dhe të afërm të Luan Llanajt dhe Tomor Mbratit kanë realizuar një mural në përkujtim të dy të rinjve, të cilët humbën jetën tragjikisht më 1 qershor në një aksident me motor në Vlorë.

Në krijimin e muraleve kanë marrë pjesë edhe shokë klase dhe nxënës të Shkollës Industriale “Pavarësia”, ku të dy ishin duke ndjekur mësimet e tyre profesionale. Vepra është pikturuar në vendin ku ndodhi aksidenti fatal, ku shenjat e përplasjes dhe kurora lulesh përkujtojnë viktimat.

Ngjarja tronditi qytetin: të rinjtë u përplasën me një shtyllë ndriçimi rrugor gjatë kthimit në shtëpi me motor. 19-vjeçari Llanaj humbi jetën në vend, ndërsa Tomor Mbrati, më i ri në moshë, ndonëse u transportua i plagosur në spital, nuk arriti t’i mbijetojë plagëve.

Të dy djemtë, nxënës të një shkolle profesionale dhe punëtorë në një servis për të mbajtur familjet, ishin shembull i përkushtimit dhe përgjegjshmërisë. Me rrogën e tyre kishin blerë motorin që fatkeqësisht u mori jetën.

Ky mural dhe përkujdesja e komunitetit reflektojnë dhimbjen dhe nderimin për dy djemtë e rinj, të cilët lanë një boshllëk të madh në zemrat e familjes dhe shokëve.