Një raund i ri i dialogut teknik mes Beogradit dhe Prishtinës u zhvillua dje në Bruksel, nën ndërmjetësimin e Bashkimit Evropian. Rreth orës 14:00 nisi takimi trepalësh, në të cilin morën pjesë delegacionet e të dyja palëve dhe ndërmjetësit evropianë, me drejtimin për herë të parë të zyrtarit të BE-së, Peter Sorensen.

Delegacioni i Serbisë, i udhëhequr nga drejtori i Zyrës për Kosovën dhe kryenegociatori teknik Petar Petkoviç, përbëhej nga ekspertë të shumtë. Në një postim në rrjetet sociale, Petkoviç theksoi atmosferën e përgatitjes në delegacionin serb, pak para nisjes së bisedimeve me palën kosovare.

Ky takim pason raundin e mëparshëm të zhvilluar më 2 qershor, kur zëvendëskryeministri i Kosovës, Besnik Bislimi, dhe Petkoviç kishin zhvilluar takime të ndara me Sorensenin. Megjithatë, takimi trepalësh i asaj date u anulua për shkak të vonesave nga pala serbe.

Në deklaratën e tij pas takimit të 10 qershorit, Bislimi konfirmoi se në agjendë ishin edhe diskutimet për qasjen e re të BE-së në procesin negociator, përfshirë përgatitjen e fazës së lartë politike nën drejtimin e kryediplomates së re të BE-së, Kaja Kallas. Ai theksoi gjithashtu se kishte ngritur çështjen e mbështetjes për shqiptarët në Luginën e Preshevës, në veçanti përmes ndihmës për fermerët e vegjël.

Por nga ana tjetër, Petkoviç e ka përjashtuar kategorikisht këtë temë nga dialogu. Ai deklaroi se i ka komunikuar qartë Bashkimit Evropian se Presheva dhe Bujanoci nuk mund të jenë pjesë e negociatave mes Kosovës dhe Serbisë.