Një ngjarje me rrezik për jetën është shmangur sot në bregdetin e Shëngjinit, falë ndërhyrjes në kohë të vrojtuesve të detit, të cilët shpëtuan një pushuese të moshuar nga Kosova që po rrezikonte të mbytej.

Sipas informacioneve paraprake, gruaja ndodhej duke u larë në det pranë një zone të mbipopulluar me pushues, kur është konstatuar në vështirësi serioze.

Vrojtuesit kanë reaguar menjëherë, duke e nxjerrë në breg dhe i kanë dhënë ndihmën e parë mjekësore në vend. Më pas, ajo është transportuar në spitalin rajonal të Lezhës, ku po merr trajtimin e nevojshëm mjekësor dhe ndodhet jashtë rrezikut për jetën.

Autoritetet bëjnë apel për kujdes të shtuar gjatë frekuentimit të plazheve, veçanërisht për moshat e avancuara dhe personat me probleme shëndetësore.