Deputetja e Kuvendit të Kosovës dhe aktorja e njohur Adriana Matoshi ka dorëzuar pranë Agjencisë për Parandalimin e Korrupsionit deklarimin e saj të rregullt vjetor të pasurisë për vitin 2025, ku ka pasqyruar të ardhurat dhe pasuritë e saj gjatë vitit 2024.

Sipas dokumentit të publikuar, Matoshi zotëron një veturë Fiat në vlerë prej 13 mijë eurosh, dhuratë nga ish-bashkëshorti i saj, që aktualisht figuron në pronësi të prindërve të saj. Po ashtu, ajo ka në pronësi të prindërve një shtëpi prej 66 metra katrorë, ndërtuar në vitin 1990, e vlerësuar në 400 mijë euro.

Deputetja ka deklaruar gjithashtu një kredi prej 15,800.03 euro në NLB Bankë, të marrë në nëntor 2024 për renovimin e shtëpisë, me një afat shlyerjeje 24 muajsh. Deri tani, ajo ka paguar një pjesë dhe i mbetet për të shlyer një borxh prej 13,210.56 euro.

Në aspektin financiar, Matoshi ka në llogaritë bankare 8,809.81 euro, të grumbulluara nga paga dhe kredi.

Të ardhurat e saj vjetore përfshijnë 21,336.12 euro nga paga si deputete në Kuvendin e Kosovës, 6,963 euro nga puna si prezantuese në Festivalin “Fest 62” në RTSH Tiranë gjatë janarit-shkurt 2024, dhe 240 euro nga shtesa e kompensime të ndryshme nga Ministria e Financave.

Në deklarim, ajo nuk ka raportuar prona të regjistruara në emër të saj, aksione, kriptovaluta, donacione politike apo letra me vlerë.