Ahmedabad – Një zhvillim kyç në hetimin e aksidentit tragjik të avionit të Air India në Ahmedabad është konfirmuar sot nga ministri i Aviacionit Civil të Indisë, Ram Mohan Naidu Kinjarapu. Regjistruesi i të dhënave të fluturimit, i njohur si “kutia e zezë”, u gjet në vendin e rrëzimit brenda 28 orëve nga Byroja Indiane e Hetimit të Aksidenteve Ajrore (AAIB).

Ky moment përbën një hap thelbësor në zbardhjen e shkaqeve të rrëzimit tragjik të avionit Boeing 787 Dreamliner, fluturimi AI171, që mori jetën e 241 personave nga 242 që ndodheshin në bord.

“Gjetja e kutisë së zezë do të ndihmojë ndjeshëm në hetimin e ngjarjes,” tha ministri Kinjarapu, duke theksuar rëndësinë e kësaj për avancimin e procesit hetimor.

Avioni, i nisur nga Aeroporti Ndërkombëtar Sardar Vallabhbhai Patel në Ahmedabad me destinacion Aeroportin Gatwick të Londrës, u rrëzua vetëm 60 sekonda pas ngritjes në zonën e banuar të Meghani Nagar, duke shkaktuar shkatërrim të madh dhe viktima në tokë dhe në bord.

Përveç 241 viktimave në avion, të paktën tetë persona u vranë në tokë, përfshirë katër studentë dhe katër të afërm të mjekëve që ndodheshin në kampusin mjekësor pranë vendit të aksidentit.

Hetuesit shpresojnë që të dhënat e regjistruesit të ofrojnë përgjigje thelbësore për shkaqet e aksidentit dhe të ndihmojnë në marrjen e masave parandaluese për të ardhmen.