Një ngjarje tragjike është shënuar këtë të diel në ujërat e lumit Mat, pranë zonës së Shkopetit, ku një 22-vjeçar ka humbur jetën ndërsa po lahej.

Viktima është identifikuar si Klajdi Elezi, i cili dyshohet se ka pësuar atak kardiak gjatë notit, çka ka çuar në mbytjen e tij të menjëhershme.

Në vendngjarje kanë mbërritur menjëherë forcat e policisë dhe mjekët e spitalit të Laçit, të cilët konstatuan vdekjen e të riut.

Rrethanat e sakta të ngjarjes janë ende nën hetim, ndërsa trupi i pajetë i Klajdit është dërguar për ekzaminime të mëtejshme. Familjarë dhe banorë të zonës janë tronditur nga lajmi, ndërsa autoritetet u bëjnë apel qytetarëve të tregojnë kujdes maksimal gjatë freskimeve në lumenj dhe ujëra të hapura, sidomos në temperatura të larta që mund të shkaktojnë probleme shëndetësore të papritura.