Ish-banorja e Big Brother VIP 3, Heidi Baci, është rikthyer në ekran me një dimension tërësisht të ri: atë të poetes. E ftuar në emisionin “Goca dhe Gra”, Heidi promovoi librin e saj të parë me poezi, të titulluar “Liminal”, duke ndarë për publikun jo vetëm pasionin për poezinë, por edhe pjesë nga filozofia e saj jetësore dhe shpirtërore.

Në një bisedë intime me moderatoren Gerta Gixhari, Heidi u ndal te një nga vargjet më të forta dhe emocionalisht të ngarkuara të librit:

“Do sakrifikoja parajsën, sepse do jepja gjithçka për të të pasur, gjithçka për të të dashur.”

E pyetur për domethënien e thellë të këtij vargu, Heidi e lidh atë me një nga poezitë më dramatike të librit, të titulluar “Shekspiri” – një poezi që trajton dashurinë si një ndjenjë tragjike dhe shpesh të dënuar me fund.

“Është shumë shekspiriane, dramë e vërtetë. Bëhet fjalë për një dashuri që është e destinuar të mbarojë. Një njeri anulon veten për dashurinë, e vret veten në kuptimin metaforik – sepse do të ngrijë një çast përgjithmonë,” – rrëfeu Heidi me një ton të ndjerë.

Duke zbuluar edhe një anë më pak të njohur të vetes, Heidi tregoi se është një person shumë fetar, dhe se Zoti është i pranishëm në shumë nga vargjet e saj. Pikërisht për këtë arsye, ajo e sheh frazën “do sakrifikoja parajsën” si një deklaratë ekstreme dashurie, që shkon kundër dogmave dhe bindjeve të saj shpirtërore – një akt sublim që vendos dashurinë njerëzore përpara shpëtimit hyjnor.

“Kur ti vret veten, qoftë edhe metaforikisht, shkon kundër disa parimeve fetare. Kështu që sakrifikon parajsën për dikë tjetër,” – sqaroi ajo.

Rrëfimi i Heidi Bacit u prit me shumë emocion nga publiku, ndërsa prezantimi i “Liminal” shënon një kthesë të re në rrugëtimin e saj artistik – nga ekranet e realitetit televiziv drejt një hapësire më intime dhe reflektuese.