Ish-banorja e Big Brother VIP 4, Loredana Brati, e njohur për natyrën e saj spontane dhe sensin e humorit që fitoi simpatinë e publikut, është rrëfyer sot me shumë ndjeshmëri në emisionin “Goca dhe Gra”.

Në një intervistë të ndjerë, Loredana zbuloi se pas daljes nga shtëpia më e famshme në Shqipëri, ka kaluar një periudhë jo të lehtë për shëndetin e saj mendor dhe emocional.

“Eksperienca brenda Big Brother nuk ka qenë aq e lehtë. Unë i ndjej shumë energjitë, e gjitha ndikoi në mirëqenien time. Pata një farë sinjali kur nuk kisha më uri si më parë… nuk kam qenë aq mirë,” – u shpreh ajo me emocion.

Ajo tha se videot që pa pas daljes nga formati e prekën thellë dhe e bënë të reflektojë për ndikimin që kishte përjetuar brenda shtëpisë.

“Videot që shikoja kur dola, ishin një thikë në plagë. Vendosa të rrethohesha me njerëz të besueshëm dhe që më jepnin pozitivitetin që më mungonte. E kam parë që nuk kisha më dritën kur hyra në Big Brother. Tani po përpiqem ta rikuperoj,” – rrëfeu Loredana, duke shtuar se ende nuk është në formën e saj më të mirë.

Sa i përket marrëdhënies së përfolur me Jozin, një tjetër ish-banor i edicionit, Loredana preferoi të ruajë privatësinë:

“E kam kërkuar ta analizoj. Ndjenjat, veten… në raport me palën tjetër. Nuk ndihem mirë të flas për këtë muhabet. Kjo është arsyeja përse nuk kam folur, nuk ndihem akoma gati. Do vijë momenti dhe do i them të gjitha.”

Në fund, ajo theksoi se sinqeriteti ka qenë gjithmonë vlera që publiku ka çmuar më shumë tek ajo dhe se tani i duhet vetëm pak kohë për të rigjetur veten.

Një rrëfim i hapur, që dëshmon se realiteti pas ekranit shpesh ka një peshë të madhe për personazhet që bëhen pjesë e tij – dhe se kurajoja për të treguar të vërtetën është një formë tjetër e forcës.