Fier, 17 qershor 2025 – Banorët e lagjes Dautaj në fshatin Varibop të njësisë Cakran dolën sot në protestë për një nga problemet më të rëndësishme të përditshmërisë së tyre: mungesën e ujit të pijshëm në banesat e tyre.

Të revoltuar dhe të dëshpëruar, banorët shprehën zhgënjimin e thellë për premtimet e pambajtura të autoriteteve lokale dhe qendrore, të cilat – sipas tyre – përsëriten çdo katër vjet, por nuk përkthehen asnjëherë në zgjidhje reale.

“Votat na i kërkojnë, por nuk na shërbejnë. Nuk kemi ujë as për të pirë, as për t’u larë. Jemi lodhur duke dëgjuar gënjeshtra”, deklaroi një banor i moshuar përpara kamerave.

Të tjerë shtuan se situata është bërë e pajetueshme, sidomos gjatë muajve të verës, kur temperaturat rriten dhe mungesa e ujit e bën jetesën të vështirë.

“Qeveritarët tallen me ne. Thonë kemi 24 orë ujë në ditë, kurse ne nuk kemi asnjë pikë në çezma. Po si jeton një familje kështu?”, u shpreh një grua, nënë e tre fëmijëve.

Banorët kërkojnë ndërhyrje urgjente nga bashkia dhe institucionet përgjegjëse, duke theksuar se nuk do të ndalen me protestat nëse zëri i tyre vazhdon të injorohet.

Situata në Varibop është një tjetër dëshmi e kontrastit mes statistikave zyrtare dhe realitetit të përditshëm në shumë zona rurale të vendit.