Kandidati opozitar në zgjedhjet e 11 majit për Bashkinë Kuçovë, Lefter Maliqi, ka hedhur akuza të rënda në drejtim të kreut të Komisionit Qendror të Zgjedhjeve, Ilirjan Celibashi, duke e cilësuar atë si “kokën e krimit elektoral” dhe si njeriun që drejtoi masakrën zgjedhore në bashkëpunim me kryeministrin Edi Rama dhe kreun e SPAK, Altin Dumani.

Në një reagim publik, Maliqi ka ripërsëritur pretendimet për manipulime masive në qendrën zgjedhore të Kuçovës, duke përmendur: ndërrimin e kutive, përdorimin e të ashtuquajturit “tren bullgar” (votim i organizuar në grup), fshehjen e formularit të dekriminalizimit për kandidatin rival Kreshnik Hajdari, si dhe një “dhomë të fshehtë” brenda KZAZ-së, që sipas tij shërbente për operacione të paligjshme elektorale.

“Celibashi është bashkëpunëtor i masakrës elektorale… Ka mbrojtur hajdarët e Rilindjes dhe ka heshtur para krimeve zgjedhore që kanë ndodhur me urdhër të Ramës dhe nën mbështetjen e Dumanit”, – deklaroi Maliqi.

Ai shton se pavarësisht paralajmërimeve të tij të mëhershme, akuzat nuk janë marrë në konsideratë dhe kërkon një reagim të shpejtë politik dhe institucional për, siç thotë, “të ndalur kapjen e shtetit nga krimi elektoral”.

Deri më tani, KQZ nuk ka reaguar publikisht ndaj deklaratave të Lefter Maliqit. Zhvillimet e fundit pritet të nxisin tensione të reja politike në vazhdën e kontestimeve paszgjedhore, veçanërisht në bashkitë ku opozita ka ngritur dyshime për procesin.