Kreu i Grupit Parlamentar të Partisë Socialiste, Niko Peleshi, ka kritikuar ashpër opozitën për mungesën sistematike në punimet e komisioneve parlamentare, duke e konsideruar këtë si arsye kryesore për vonesat në shtimin e projektligjeve.

Në një deklaratë gjatë seancës plenare, Peleshi theksoi se mazhoranca është e vendosur të çojë përpara një axhendë të ngarkuar legjislative deri në përfundim të sesionit parlamentar përpara pushimeve verore.

“Grupi jonë është për të ecur para me një axhendë të ngarkuar, deri në fund, para se Kuvendi të nisë pushimet. Kemi shumë punë para, janë rreth 20 akte për t’u miratuar,” u shpreh ai.

Peleshi shtoi se puna e Kuvendit nuk ndodh vetëm të enjten në seancë plenare, por zhvillohet gjatë gjithë javës në komisione, ku sipas tij, opozita mungon pothuajse totalisht.

“Ju nuk vini në komisione dhe pastaj kërkoni pse nuk shtohen projektligjet. Ejani t’i shtojmë të gjitha, por dikush duhet të punojë, dikush duhet të vijë në mbledhje.”

Sipas tij, Partia Socialiste është detyruar të mbajë barrën e të gjithë procesit legjislativ për shkak të bojkotit de facto të opozitës në komisione.

“Ju bëni vetëm seancën tuaj të zakonshme, të fjalës për procedurë dhe diskutimet jashtë rendit të ditës,” tha ai, duke shtuar se “me ju apo pa ju, ne do ta mbyllim me sukses këtë sesion parlamentar për të nisur në shtator”.