Deputeti i Partisë Demokratike, Tritan Shehu, ka reaguar me tone të ashpra në Kuvend, duke akuzuar mazhorancën dhe kryetaren e Kuvendit për zvarritje të qëllimshme të projektligjeve të rëndësishme dhe për “shkatërrim të anës proceduriale” të punës parlamentare.

Gjatë diskutimeve, Shehu u shpreh i shqetësuar për një tendencë të mazhorancës për të çuar Parlamentin në pushime pa përmbushur detyrimet legjislative:

“Parlamenti të bëjë pushimet… punimet…. Nëse do e fusni Parlamentin për pushime të pajustifikuara… Zonja kryetare, ju po shkatërroni plotësisht anën proceduriale të procesit.”

Ai akuzoi kryetaren dhe shumicën për mbajtjen pezull të disa projektligjeve të depozituara nga opozita:

“Janë paraqitur projektligje nga ne, ju po i shtyni, nuk po i sillni. Kështu vepruat edhe për gjenocidin në Kosovë, e shtytë, e latë jashtë, nuk e keni sjellë.”

Një tjetër çështje që Shehu theksoi ishte projektligji për mbrojtjen e familjes dhe kundër konceptit të “prindit një dhe prindit dy”, për të cilin ai kërkoi që të përfshihet në seancat e mbetura të këtij sesioni:

“Kështu edhe për atë me dy gjini, prindi një e prindi dy – qëllimisht nuk po e sillni, po dëmtoni rëndë familjen. Ta kalojmë në një nga dy seancat e mbetura atë projektligj, por unë i di votat tuaja, thelbin për shoqërinë njerëzore dhe familjen – ndaj silleni ta kalojmë.”

Deklaratat e Shehut erdhën në një klimë të tensionuar politike mes mazhorancës dhe opozitës, ndërkohë që afron fundi i sesionit parlamentar dhe pritet mbyllja e disa nismave ligjore në pritje.