Një helikopter privat, i marrë me qira për transportin e një grupi turistësh drejt ishullit të Mykonosit, u rrëzua të dielën pasdite në detin në jug të Athinës, pak minuta pas ngritjes në ajër. Ngjarja u vërejt nga pushues në plazh, ndërsa shkaqet mbeten ende të paqarta.

Në bord ndodheshin pesë persona — piloti dhe katër turistë të huaj — të cilët arritën të dalin në breg dhe janë jashtë rrezikut për jetën, duke pësuar vetëm lëndime të lehta. Piloti 57-vjeçar dyshohet se ka konstatuar një problem teknik gjatë ngritjes dhe u ka kërkuar pasagjerëve të hidhen në det për të shpëtuar, ndërsa ai ka qëndruar në helikopter për të tentuar stabilizimin e tij.

Në operacionin e shpëtimit morën pjesë mjete të Rojës Bregdetare, një mjet tokësor dhe një zhytës privat që ndihmoi në nxjerrjen e helikopterit nga uji.

Prokuroria e Athinës ka nisur një hetim paraprak për të zbuluar shkaqet e rrëzimit dhe për të përcaktuar nëse ka përgjegjësi penale. Piloti u arrestua fillimisht nga autoritetet portuale, por më pas u la i lirë, duke qenë nën hetim.