HIMARË – Për të garantuar një sezon turistik të qetë dhe estetikisht tërheqës, kryetari i Bashkisë së Himarës, Vangjel Tavo, ka firmosur një urdhër të posaçëm që pezullon të gjitha punimet ndërtimore në zonën turistike të qytetit nga data 15 qershor deri më 15 shtator 2025.

Vendimi prek të gjitha subjektet që zotërojnë leje ndërtimi të lëshuara nga Bashkia e Himarës dhe ka si synim ruajtjen e ambientit, pamjes urbane dhe përmirësimin e përvojës së vizitorëve vendas dhe të huaj gjatë sezonit të verës.

Sipas urdhrit, subjektet ndërtuese janë të detyruara të rrethojnë dhe mbulojnë objektet e papërfunduara me materiale estetike, në mënyrë që të shmanget çdo ndikim negativ vizual në hapësirat publike dhe në panoramën e qytetit.

Gjithashtu, ndërtuesit duhet të rikthejnë në gjendjen e mëparshme çdo zonë ku kanë ndërhyrë, përfshirë rrjetet e ujësjellësit, komunikacionit apo rrugët publike.

Për zbatimin e këtij urdhri janë ngarkuar Drejtoria e Mbrojtjes së Territorit, Policia Bashkiake dhe Drejtoria e Planifikimit dhe Zhvillimit të Territorit, të cilat do të monitorojnë vazhdimisht respektimin e ndalimit të punimeve dhe do të ndërhyjnë në rastet e shkeljes.

Ky vendim vjen në një kohë kur Himara po përgatitet për të pritur mijëra turistë dhe synon të ofrojë një destinacion të pastër, të sigurt dhe estetikisht tërheqës për pushuesit.